by Neddie Manhic

Kapag ang pag-ibig sa puso’y pumintig
Walang anumang dito’s makalulupig
Ito ay katulad ng matibay na lubid
Isang pambigkis na hindi mapapatid

Kapag ang pag-ibig sa puso’y bumukal
May pagpapahinuhod yaong pagmamahal
may magandang loob na ganap at sakdal
Pagbabata, pagtitiis at pag-asa ay iiral

Kapag ang pag-ibnig ang siyang naghari
Walang pagmamapuri at pananaghili
Walang pagpapalalo at mahalay na ugali
Walang pagkayamot at masamang budhi

Kapag ang pag-ibig ay nananalaytay
may kagalakan, kapayapaa’t kalakasan
Hindi ito maramot, manapa’y mapagbigay
Muhi sa kalikuan ngunit batbat ng katuwiran

Ang pag-ibig ay puno ng talinhaga
Ito ay bumubukal sa puso ng kusa
May mabuting mithiin at mapagparaya
Sa lahat ng tao…
O pag-ibig maghari ka…

Nawa.